ثقافة عامةمعلوميات

أمريكا بحاجة الى دولار رقمي، الدولار الرقمي (Digital dollar) لا يمكن أن يكون مطابقا للبيتكوين (Bitcoin) !

الدولار الرقمي (Digital dollar) لا يمكن أن يكونمطابقا للبيتكوين (Bitcoin) !
“أمريكا بحاجة الى دولار رقمي … على الدولار الأمريكي ان يستمر في كسب مكانته في النظام المالي العالمي. يجب أن يكون أفضل من البيتكوين … يجب أن يكون أفضل من Digital yuan ديال الصين”
هادو كانو كلمات واحد السيناتور أمريكي سميتو Tom cotton فواحد الاجتماع ديال لجنة الأبناك الامريكية بمجلس الشيوخ باش يناقشو Digital dollar.
المتداولين و الخبراء فالمالية كايعرفو مزيان بلي مجموعة النخبة عندهم رغبة كبيرة في الابتعاد عن النقد المادي بشكله الكلاسيكي و التوجه للمسار الرقمي.
ف شهر مارس لي داز أعلن الكونجرس على نية أمريكا فإنشاء عنلة رقمية و هادشي بان أول مرة واحد مشروع قانون قدماتو المتحدثة بإسم البيت الابيض Nancy pelosi.
كانت الفكرة هي الاحتياطي الفيدرالي federal reserve ينشئ و يقون بإدارة عملة رقمية مركزية باش يسهل التعاملات المالية خصوصا المتعلقة ب Covid-19 … كيفما كانعرفو الحجر الصحي الخ… لذلك بغاو بنادم يخلص بشكل رقمي … و كل أمريكي تكون عندو محفظة دولار رقمية يمكن ليه يقوم بالادارة ديالها من خلال الطيلي ديالو و كتشجيع لعاد المبادرة .. federal reserve ايحط لهاد الناس مبلغ مالي تحفيزي ايلا خدمو بيها.
فمسار هاد مشروع القانون ..تعرضت الفكرة لبزاف ديال العراقيل و لي خلاها من المستحيل تطبق فالنسهة النهائية ديال القانون .. و مع ذلك عاودات رجعات للواجهة فبزاف ديال جلسات مجلس الشيوخ و خصوصا فآخر اجتماع ديال اللجنة المصرفية .. و كذلك علن بنك الاحتاطي الفيدرالي فالشهر لي داز انه خدام معا معهد ماساتشوستش للتكنولوجيا (MIT) باش يطبقو هاد فكرة الدولار الرقمي.
و هنا كايبان لينا بشكل واضح انه بعض من اقوى الشخصيات فالعالم دايرين مجهود باش يخرجو من المجتمع التقليدي و يدوزو لانشاء مجتمع غير نقدي.
اذن هادشي غادي يخليني نقول بشكل صريح ان الدولار الرقمي جاي فالطريق و قريب بزاف !
بزاف ديال الاخبار كاتأكد ان يوم 1 يناير 2021 ايكون هو اول يون لتطبيق هاد Digital dollar.
واش هادشي كايعني انه مرتبط بموضوع انخفاض سعر الدولار ؟ اه بطبيعة الحال هههه و كلنا كانعرفو انه تاريخيا السياسيين و صحاب الثروة مايمكنش يخليو شي أزمة بحال كوفيد-19 دوز بلا مايغيرو شي حاجة ! (هادشي لا يعني انه كاينة نظرية المؤامرة).
و من ناحية اخرى .. يقدرو يديرو شي خطوة باش يحدو من استخدام النقود الورقية (الكاش) و يخليو الناس يدوزو للنقد الرقمي مكرهين و ماشي مخيرين … بحال كيفما وقع فالهند لي نجحات فحظر اغلب العملات الورقية الكبيرة فالقيمة فسنة 2016 .. و بزاف ديال المحللين عتابروها بحال بالون تجريبي لبقية الدول في حالة بغاو يديرو نفس الحاجة !
و من ناحية اخرى بزاف ديال المحللين كايقولو ان الدولار الرقمي ايشكل واحد التحول خطير و هو فكرة معكوسة عن المجتمع الحر و باغيين يرسخو هاد الفكىة للناس عن طريق تحفيزات مالية و بزاف هضرو على انه اتكون تقريبا 2000 دولار …
هلدي فقط خطة باش الناس يوليو اكثر انجذابا للمجتمع الرقمي.
و كاين كذلك لي عتابرها انها بحال عملية الاحتيال لي وقعات فالاوراق الورقية و لكن بملصق جديد عليها و صافي … بحال شي منتوج سالات الصلاحية ديالو و بدلتي ليه الاومبالاج و عاودتي خرجتيه للسوق على اساس منتوج جديد !
و قالو كذلك انه غادي يسهال على الدولة تقوم بعملية تضخيم العملة و فرض فوائد كبيرة و ضرائب بمسمى الصالح العام !
و بضل هاد عملية الاحتيال غادي يكون عند الدولة اداة جديدة باش تسيزي الثروة و تعاود توزعها !
كاين بزاف ديال الامور السلبية و لكن كاين واحد الجانب مضيء.
برنامج العملة الرقمية غادي يخلي ملايين الناس يعرفو العملات الرقمية و يولفو على الاعتماد عليها فالمعاملات و لكن هي فقط مسألة وقت قبل مايعرفو البيتكوين.
فبداية المقال قلت بالحرف ان واحد السيناتور امريكي قال انه هاد العملة خاصها تكون حسن من البيتكوين.
و لكن ايلا لاحظتي راه ماذكرش باقي العملات المشفرة الاخرى و هادا اعتراف مباشر بالخصائص النقدية الفائقة لي كايتميز بيها البيتكوين و لي كايعتلقدو الخبراء انها كاتهدد الدولار بشكل مباشر.
الدولار الرقمي و البيتكوين كايتشاركو فبعض الخصائص …بجوجهم رقميين و سهلين فالدفع السريع من الهاتف و لكن هادا هو التشابه الوحيد فقط !
الحقيقة هي ان الدولار الرقمي و البيتكوين مختالفين تماما فبزاف ديال الامور الجوهرية
خاصك اذن و موافقة الدولة الامريكية باش تخدم بالدولار الرقمي (كارط ناسيونال – شهادة السكنى الخ…) عكس البيتكوين
يمكن للدولة الامريكية تصايب و تضخ فالسوق ملايين من الدولار الرقمي ! على عكس البيتكوين لي محدود ف 21 مليون بيتكوين و لايمكن و مستحيل يكون اكثر من هاد الرقم و لا يمكن لاي شخص تضخيم العرض اكثر من المبلغ المحدد مسبقا.
الدولار الرقمي مركزي … البيتكوين عملي لا مركزية
يمكن للدولة الامريكية تفرض رقابة على المعاملات و تجميد و فرض عقوبات و مصادرة الدولارات الرقمية فأي وقت بغات و لأي سبب كان. اما البيتكوين فهي مقاومة للرقابة و مايمكنش تكون عقوبات او قوانين شي بلد تطبق عليها او تؤثر عليها !
فالدولار الرقمي ماغاديش تكون الخصوصية اما البيتكوين فراه العكس
الدورلار الرقمي غادي يسهال الانتاج ديالو حيت عبارة عن اموال حكومية و غادي يعطي الحق للدولة سيطرة اكثر و اكثر على حياة الناس … الييتكوين هي عماة غير حكومية و كاتخلي الشخص حر.
باختصار الدولار الرقمي هو محاولة مثيرة للشفقة لمنافسة البيتكوين ههههه
البيتكوين بحالاا قلتي هو الذهب الرقمي و الدولار الرقمي هو فقط حلوى رقمية لا غير
و لكن فنفس الوقت هو حصان طروادة للبيتكوين
هادشي ماخاصوش بزاف ديال الذكاء باش تفهم انه بنجرد تضخيم الدولار الرقمي و فرض رقابة على المعاملات و تجميد الحسابات بشكل تعسفي و مصادرة الاموال غادي يخلي الناس يقلبو على البديل الرقمي و يتوجهو للبيتكوين
الدولار الرقمي هو حافز كبير لاعتماد البيتكوين..

و لكن واش امريكا قادرة تحبس البيتكوين و تخلي فقط الدولا الرقمي ديالها؟
اولا تشفير البيتكوين غير قابل للكسر و مؤمن لدرجة خيالية
و زيد عليها البيتكوين خدام فشبكة تطوعية و غير مركزية منتشرة حول العالم على ملايين الحواسيب (ما يسمى بتعدين البيتكوين)
و من المستحيل على الحكومات كيفما كان نوعها انها تحبس هاد العملة … او غادي يخصها طفي الانترنيت و تعاود تخدمو من جديد !
ايلا حاولات اي دولة حظر البيتكوين فهادشي غادي يكون بمثابة اعتراف صريح بقيمتها و تهديدا لسيطرتها على الاموال و غادي يوقع ليهم بحال ملي حاولو عبر العقود يحضرو الحشيش و ماقدروش و باقي لدابا فمحلات كثيرة عبر العالم خصوصا امريكا و هولاندا … هادا شيء ملموس و ماقدروش يحبسوه فنا بالك بالبيتكوين لي رقمي !
صراحة بغيت نشوف محاولة الدول حضر هاد البيتكوين و مايقدروش 🤣🤣
و هادا هو الهدف بالظبط ! امريكا ماتقدرش توفف البيتكوين و لكن هي مجبرة انها دوز للعالم الرقمي حيت عارفة مزيان ان السلع النقدية الاخرى لي غير متحكمة فيها بدات فمنافسة الدولار بحال للبيتكوين و باقي العملات الرقمية !
حسب تحليلي الشخصي الدولار الرقمي غادي يزيد يساهم فالتضخم و يشجع الناس اكثر على اعتماد البيتكوين Reverse competition

By Reda el haraoui 🇲🇦✍️

‫2 تعليقات

  1. اذن نبداو بتحليل بتكوين حيت ناس معيدخلو نعملة المرقمنة عيجبرو كاين محسن من دولار رقمي وعيوجهو اتوماتيكيا نبتكوين هاذا كعني انا بتكوين قيمة عتزاد ارا نستثمرو فيها من ذابا وكنذن هذه خطة مدروسة باش تكون بتكوين كعملة رئيسة بطريقة غير مباشرة في المستقبل البعيد وأن دولار هو فقط محفز وهمي يخلو ناس يعتقد انه شنهار عيغلب لعملات رقمية

  2. ونسينا عملة زيبرا لتقدر تشكل على المدى البعيد استثمار وقوة لشركة فيسبوك في عالم العملات مما عيرجعنا نتنافسية قديما بين اورو ودولار ومستقبلا بين زيبرا والبتكوين او دولار رقمي و البتكوين . وكنضن انا اوروبا ضروري وخاصتا بريطانيا عتعمل عملة كيفما الصين وعيكون سوق جديد البرصة الرقمية لعتولد مجال استثماري جديد حر دو مخاطر عاليا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock