شنو هو الفرق ما بين HUB و SWITCH و ROUTER ؟

السلام عليكم
و كيفما العادة هاد المقالة داخلة فالدورة ديال #HKG_NETWORKING لذلك الى ما قريتيش لمقالات لي فاتو رجع ليهم باش تفهم

وهاد المقالة ديال اليوم غانهضرو فيه على 3 د الاجهزة غالبا غاتكونو سمعتو بيهم و غاندكرو الفرق بيناتهم و الخدمة ديال كل واحد فيهم
اول جهاز هو الـHUB :
هاد الجهاز حاليا ما بقاش كايتستعمل تقريبا حيث قديم وفيه مشاكل و هو كان كايتستعمل فأنه يربط مجموعة ديال الحواسيب فواحد الشبكة خاصة يكفي انك تربط هادوك الحواسيب مع داك ال HUB عن طريق الكابل باش الى بغيتي تسيفط لشي حاسوب داخل ديك الشبكة شي ملف ولا شي حاجة بحال مثلا داخل شي شركة تقدر تربط غاع الحواسيب ديال الشركة مع بعضياتهم و تكون شبكة خاصة تبقاو تاتراسلو غابيناتكم ولكن المشكل ديالو هو انه مثلا نتا بغيتي تسيفط شي ملف لشي واحد معاك فديك الشبكة هاد ال HUB تايشدها وتاينسخها و تايسيفطها لغاع هادوك لي معاك فالشبكة يعني تايفرشك، و كإضافة و صافي هو ان هاد ال HUB تايخدم فالطبقة اللولة من OSI لي هي PHYSICAL رجعو للبوسطات لي فاتو غاتلقاو الشرح ديال الطبقات داكشي علاش ما عندوش الذكاء الكافي لي يخليه يقرا الرسالة و يتصرف

هنا جا الدور ديال الـSWITCH :

هاد الجهاز خدمتو بحال الجهاز اللول ولكن هادا دكي عليه هادا الى ربطتيه مع مجموعة ديال الاجهزة تايدير واحد الجدول و تايدير كل مدخل و الماك ادريس ديال البيسي لي مربوط معا داك المدخل و هنا فاش كاتسيفط من البيسي ديالك شي حاجة لشي بيسي اخر معاك فديك الشبكة الخاصة كاتمشيليه هو بوحدو و ما كايشوهكش حيث كاتكون فديك الباكيت لي مسيفط الماك ادريس ديال المرسل و المرسل إليه و هاد السويتش كايخدم فالطبقة الثانية من OSI لي هي DATALINK داكشي علاش كايخدم بالماك ادريس

و الجهاز الثالث هو الـROUTER :

هاد الجهاز غالبا تايكون مربوط مع سويتش يعني ديجا تايدير خدمة السويتش لي هي يقدر يربط بزاف دالاجهزة فشبكة خاصة و تقدر تتاصل بيه بشبكة الانترنيت و تايخدم بالايبي وهاد الراوتر كايخدم فالطبقة الثالثة من OSI داكشي لي كايخليه انه يقدر يقرا الايبيات

المهم كي العادة نتمناو الموضوع يكون مفيد و ماتنساوش تشاركونا بالرأي ديالكم ❤️✌️

بقلم: YSN_KH