كيفاش كيتم لاستهداف ديالي بفيروس الفدية ransomware

السلام و عليكم،
مؤخرا شفت عشرات دلبوسطات فلغروبات تيهضرو على شي مشكل عندهم فلبيسي و غاع لبوسطات لي شفت فيهم تصاور تيبينو على انهم تصابو بفيروس الفدية ransomware هاد نوع دلفيروسات خطيرة بزاف بحيث تيطلب منك الهاكر اولا مول لفيروس بصفة عامة مبالغ هائلة بلبتكوين و الا مخلصتيش داك لمبلغ مغيرجعوش لك لبيانات ديالك غالبا هاد لفيروس كان تيضرب شركات و رجال لاعمال مي مؤخرا ولاو تيقصدو بيه اي واحد و ولاو تيدمجوه مع العاب و تطبيقات لي تيقلب عليهم بنادم بزاف .
الهاكرز مؤخرا ولاو تيستهدفو ضحايا ديالهم عن طريق لالعاب خصوصا العاب اونلاين ولاو تيتحطو على اساس العاب مكركة و بلي قادر تلعب اونلاين حقا قادر تلعب اونلاين مي غالبا ما تيكون مدموج بفيروس لفدية و تا تطبيقات بحال لفوتوشوب و التطبيقات لي تيحتاجهم بنادم بزاف .
و كاين تا فيروسات لي كيستغلو المعالج و لحاسوب ديالك بصفة عامة اشهرهم التعدين الخبيث cryptojacking هاد نوع دلفيروسات كتستاغل الحاسوب ديالك و المعالج ديالك باش تعدن العملات الرقمية و هكا تيسيفط لمبالغ لي كتعدن للهاكر و غالبا تا هو متيكون فلالعاب و التطبيقات المكركة .
مؤخرا واحد المجموعة دلهاكرز دخلو ما يقارب 2 مليون دولار من مجموعة دلالعاب نشروهم للعامة على اساس قادر تلعب اونلاين فابور اييه اتلعب فابور مي لمعالج ديالك فنفس لوقت تياكل لعصى .
لذالك باش تحمي راسك من هاد لبؤرة خاصك تحديثات يومية للجهاز ديالك و خاصك برامج تبقى تسكاني بيهم الحاسوب ديالك (avast- malwarebytes …) خاصك تخدم عقلك و متفكرش غير فلعب و لهو و لفابور لقيتي ليان ؟ سكانيه ف virustotal و فاش تانسطالي لgame سكانيها تا هيا ف virustotal متعجزش را كولشي قدامك، الا تضرب لك لبيسي ديالك بفيروس ديك ساعة صافي ادا حماد مبقى لا سكان لا والو الا فحالت اترجعهم بريكوفري (و لي هيا حالة نادرة ماشي ديما تتنجح) اولا تهضر مع لهاكر براسو يعطيك ل key .
هدا بوسط خفيف مشرحت فيه والو غا وضحت و نبهت خدمو عقلكم و را هادشي لي قلت تينطابق على غاع لاجهزة سوا android pc tv …
صحاب نيتفلكس فابور و صحاب حمل لتربح المال را نتوما فاش تتجي ضربة احذروو !
طهلاو ❤