السلام عليكم
هاد البوسط غايكون داخل فديك الدورة دالشبكات لي كنا دايرين لذلك الى كنتي مزال ما قريتي البوسطات اللولين رجع قراهم غاتلقاهم فهاد الهاشتاغ #HKG_NETWORKING
و بما اننا ديجا شرحنا شناهو الايبي و عطينا الانواع ديالو اجي نشوفو منين كايجي هاد الايبي و كفاش حتا كايخدم
اول حاجة مثلا انا شريت بيسي فاش غانشعلو غانكونيكطيه مع الويفي ديالنا فاش غانكونيكطيه مع الويفي غايعطيه الراوتر ايبي داااااااااخلي و ركز مزيان على داخلي حيث كاتقدر تبقا خدام بيه غير فداخل الشبكة ديالك يعني ماكاتفوتش بيه الشبكة ديالك مثلا الويفي ديالك ولا الويفي ديال القهوة داك الايبي الداخلي غاتقدر تبقا تتواصل بيه غا مع الراوتر ولا الاجهزة لي متاصلين فنفس الشبكة ديالك حتا لهنا متافقين دبا مني غاياخد البيسي الايبي الداخلي غايخصو الايبي الخارجي و هاد الايبي الخارجي هو لي غاتقدر تتاصل بيه مع باقي الاجهزة فالانترنيت خارج الشبكة و تتكونيكطا بيه هاد الايبي الخارجي تاتعطيه ليك ISP لي نتا مشتارك معاهم يعني شركة الاتصال ولي هي بدورها كاتاخدو من احد الفروع ديال شركة IANA لي حاكمة هاد لبلان كامل ولي هوما 5 ديال الفروع و كل وحدة شادة جهة حاكماها كيفما غاتشوفو فالصورة لتحت و حنا شادانا AFRINIC المهم هاد الشركة كاتقدم جوج انواع دالايبيات لي هوما IPV4 و IPV6 خليونا دبا ف IPV4 هاد النوع مقسماه الشركة ل 5 دالمجموعات هاد 5 ديال المجموعات كاين :
Class A
Class B
Class C
هادو هوما لي كايخدمو بيهم الناس اما هادو لي غاندكر دبا:
Class D
Class E
محجوزين لحوايج اخرى بحال الابحاث و شي حوايج اخرى …. نقدرو نهضرو عليهم من بعد
مهم دوك الثلاثة اللولين هوما لي غانهضرو عليهم دبا الى كنتو باقيين عاقلين كنا قلنا ان IPV4 كاينقسم ل 4 ديال الاجزاء و كل جزء بين كل جزء و جزء نقطة ما يمكنش يفوت الرقم 255 هاد الاجزاء كانقولو ليهم octet
دبا اسيدي هادشي اشنو علاقتو بالمجموعات لي دكرنا الفوق العلاقة بيناتهم هو انا هاديك الشركة دايرة هاد المجموعات بحال شي packs يعني نتا مثلا غاتفتح شركة ديال الاتصال فالمغرب و غاتبغي تاخد ايبيات غاتمشي عندهم و غاتقوليهم شحال ديال المستخدمين غادي يكونو عندك من هنا للقدام دبا مثلا الى كانتي عارف انه غايكونو عندك مستخدمين بزاف فالشركة ديالك غايعطيوك
Class A
حيث هاد المجموعة الى كانت عندك غايكون عندك كثر من 16 مليون ايبي خارجي و كيفما قلنا فالبوسطات لي قبل هو انه IPV4 تايكون ايبي خارجي واحد لكل راوتر و لي مسؤول على هاد الخدمة هو واحد البروتوكول سميتو NAT ديجا دكرناه فالبوسطات لي دازو يعني غاع دوك الناس لي خدامين فداك الراوتر كايتكونيكطاو بنفس الايبي الخارجي و لك ان تتخيل شحال ديال بنادم غايتكونيكطا بديك 16 مليون ايبي خارجي يعني الشركة لي غادا تاخدو خاص تكون ضخمة وهاد الايبيات تايبداو من :
1.0.0.0
حتا ل :
126.255.255.255
اما الى كانت عندك شركة متوسطة و ماغاتحتاجش ل 16 مليون كاملة غايعطيوك المجموعة الثانية
Class B
ولي هو بدورو كيتوفر على كثر من 65 الف ايبي خارجي ولك ان تتخيل و كيفما قلنا را ماشي لكل جهاز ايبي ولكن لكل راوتر وهاد الايبيات تايبداو من :
128.0.0.0
حتا ل :
191.255.255.255
و اما الى كانت شركة على قد الحال غايعطيوك المجموعة الثالثة و لي هي
Class C
و لي كاتتوفر 254 ايبي خارجي و بالنسبة لشركة صغيرة را ماشي قليلة و تايبداو من
192.0.0.0
حتا ل :
223.255.255.255
حتا لهنا متافقين ياك !
اوا الى لاحضتو غاتلقاو بلي فهاد المجموعات كاين بين كل مجموعة و مجموعة رقم ما تدكرش مثلا بين Class A و Class B كاين واحد العدد ديال الايبيات لي بقاو خارج الحساب و ما هوما محسوبين لا على المجموعة اللولة ولا المجموعة الثانية هاد العدد تايبدا من
10.0.0.0
حتا ل
10.255.255.255
والى لاحظتو كلهم كايبداو ب 10 يعني دبا اي ايبي لقيتيه كايبدا ب 10 عرفو ايبي داخلي و ماشي خارجي و هاد النوع كايتسمى
Address range
و هاشي كاينطابق حتا على غاع الايبيات لي من
172.16.0.0
حتا ل
172.31.255.255
لي بقاو فالمجموعة B
وحتا على الايبيات لي من
192.168.0.0
حتا ل :
192.168.255.255
لي بقاو فالمجموعة C
و كيفما قلنا هادو لي دكرنا فاللخر كايتسماو address range
حتا لهنا نكونو سالينا نتمنى يكون الموضوع يكون فادكوم بشي حاجة و ماتنساش معاك شي كلمة زوينة تخلينا نزيدو و الى بانت ليكم شي حاجة غلط قلوها نصححوها و شكرا ✌️❤️
بقلم: YSN_KH
