دورة في التجارة الإلكترونية : الحصة الثانية الجزء الأول
السلام عليكم الإخوان شكرا ليكم على مواكبة الدورة
الحصة لي فات دوينا على مفهوم التجارة الإلكرونية والمميزات ديالها وحجم الأموال لي كتداول فهاد المجال مهم
هاد الحصة غانتعرفو على أش غايخصني باش نبدا فالتجارة الإلكترونية بالحرف
ولكن قبل ما نبدا بغيت غي نوضح واحد الفكرة لي بسيطة لي هيا الفرق بين ( التجارة الالكترونية ) و ( التجارة الالكترونية في المغرب )
التجارة الالكترونية أو “الايكوميرس” بصفة عامة هي البيع و شراء عن طريق الانترنت يعني أن عملية البيع و الشراء كتمر عبر الانترنت و لخلاص كيكون أيضا عن طريق الانترنت إما ” بطاقة بنكية ” أو “بايبل” أو “بايونير” أو أو أو حيت كاين بزاف ديال وسائل الدفع الإلكترونية .
و هنا كايكمن الفرق بين الايكوميرس و الايكوم لوكال أي التجارة الالكترونية في المغرب
حيت التجارة الالكترونية في المغرب تا هي كاتعتامد على الانترنت فكاع المراحل لي هوما ” الاشهار” و ” الموقع” و ”الصفحة” و تهضر مع لي كليان ,,,,,,
ولكن حاجة وحدا لي مختلفا ولي هيا أن الدفع أي لخلاص كيكون مباشر أي أن لكليان ماكايخلص التمن المنتج حتى كيتوصل بيه.
يعني بخلاصة سريعة الايكوميرس هي تجارة كدوز كاملة من الأنترنيت بدون ماتلاقا مع لكليان ، أما الايكوم لوكال كاتعتامد على الانترنت فكاع المراحل لكن الدفع “الخلاص” يكون مباشر “كاش” وماشي عبر وسائل الدفع الرقمية أو الإلكترونية.
سو نبداو
مهم كاين مجموعة من الخطوات الي خاصنا نديروها قبل مان دخلو إلى عالم التجارة الإلكترونية في المغرب، وهي :
أول حاجة وهي بطاقة بنكية : هادي كتعتابر الخطوة الاولى لي غايخاصكوم ديرو ، غايخاصكم تمشيو البنك الي باغي تعامل معاه وفتح معاهم حساب وقوليهم بلي باغي بطاقة بنكية عالمية أي أنترناسيونال باش تقد دير حملات إعلانية فالفايسبوك وتخلص بديك لاكارط.
ثانيا التسجيل مع شركة توزيع : يعني شركة ديال ليفريزون كاين بزاف ديال الشركات لي كتليفري في المغرب ولكن لي مشهورة وهي شركة “أمانة” واخا غاليا شويا ولكن كتبقا شركة لي معروفة وعنها مصداقة لي كبيرة
وكذالك راه كاينين شركات أخرى فالمغرب لي عنها سيغفيس و بأثمنة لي معقولة يكفي تقلبو عليها فكوكل
ثالثا انشاء صفحة على الفايسبوك: باش غانديرو حملة إعلانية فالفايسبوك راه غايخاصنا ضروري تكون عندنا صفحة فالفايسبوك يمكنليك تقاد صفحة على الفايسبوك بزربة ، يكفي دخل ليوتيب وتكتب كيف أنشأ صفحة علي الفايسبوك و تبع دوك الخطوات لي تما وهانتا ساليتي
سو من بعد ماقاديتي الصفحة غايخصك لوغو لي غاتخدم بيه يكون احترافي و انيق و كذلك اسم لي يكون ساهل و مامعقدش
سو كانو هادو هوما المراحل لي ضرورية خاصكم ديروهم قبل ماتبداو فالتجارة الإلكتونية فالمغرب
سو دابا غاندوي ليكم على واحد القضية نضرا الأهمية ديالها باش تبدا أي بيزنيس الأغلب فيكم ضارهم راسهم باش يعرفوها ولي كلشي كيسول عليها لي هيا شحال خاصني باش نبدا التجارة الإلكترونية فالمغرب أي شحال خاصني باش نبدا
ولكن قبل ما نقوليكم شحال خاصكوم باش تبداو التجارة الإلكترونية فالمغرب نخليكم تعطيوني الإقتراحات ديالكم
سو أنا غانجاوبكم ؟
الجواب ديال هاد السؤال رهينة بيك نتا ، أيييه نتا تقد تبدا باش ما بغيتي بحكم التجربة ديالك حيت كاين فيكم لي عندو خبرة ف التجارة الإلكترونية يعني فايت خادم فيها ولكن ماكملش حيت يقد يكون خسر وماربح والو حيت بكل بساطة راه ممكن تخسر ممكن تربح حيت عادي جدا تخسر فشي بزنس ولكن واخا تخسر كون أكيد غاتكون تعلمتي بزاف ديال لحوايج لي مثلا تقد تكون تعلمت كيفاش تجيب منتجات بثمن لي رخيص أو كيفاش تلقا المنتج لي مطلوب أو أو أو
نكملو شي نقاط ونوريكم فالخطوة الجاية كيفاش غاتجيبو المنتج الرابح أي المنتج لي تقد تربح منو
كيما قلنا قبل فهاذ الشخص لي عندو خبرة سيحتاج إلى رأس مال بسيط و قليل بالمقارنة بواحد لي مبتدأ.
و بالنسبة لواحد لي مبتدئ فرأس المال الذي غايحتاج باش يبدا مرتاح ويخدم بروفيسيونال هوما بين 5 إلى 7 ألاف درهم
لأنه كون أكيد غاتلقا صعوبات باش تبدا فالاول وخايخصك راس المال لي يكون بين 5 إلى 7 ألاف درهم
حيت المصاريف باش غاتقاد سطور إحترافي ديالك و باش غادير الإعلان و باش غاتوصل المنتجات لناس و باش تبقا ديبلاصا باش تجيب المنتوج لمولاه وباش غاتخلص المنتوج وباش دوي مع لكليان هادشي كامل راه غايخصو راس المال لذلك كنضن مبلغ 7 الاف درهم مبلغ لي زوين و مريح لناس المبتدئيين
أما بالنسبة الإخوان لي معندهومش هاد المبلغ فهنا غانعطيكم واحد الطريقة لي تقدو تبداو بيها وماغاطلبش منكم هاد المبلغ كامل غاطلب منكوم غي بين 2000 درهم و 3000 درهم لي فيها غي مصاريف سطور والإعلانات والشحن ولكن راه فيها شويا ديال تمارة لهاذا خاصكم تصبرو حيت بكل بساطة المنتوج لي غالي وكايدي لينا راس المال ماغانشريوه تا يطلبو لينا لكليان
سو الطريقة هيا هادي
النضام لي غانخدمو بيه سميتو CODD سو أشناهوا هاد CODD بعدا
كاين شي حد فيكم عندو شي فكرة ؟؟ فايت ليكم سمعتو بال Dropshipping و Cash on Delivery
سو ركزو معايا باش تفهمو مزيان
أولا هاد الطريقة المميزات ديالها وهي مكتريسكيش بالمنتج يعني مكتخسرش فلوسك حيت تخاف تمشي تشري شي 100 حبة من شي منتج معين ومايتباعش ليك يبقا واحل ليك فراسك أما يلا طبقتي هاد الطريقة فراه فلوسك كيبقاو أمانة و ماغاتشري تا حاجة تا يشري عليك لكليان
طيب Dropshipping و Cash on Delivery هوما جوج فروع مختالفين ولكن من مجال واحد لهو التجارة الألكترونية و لكن الأعلب ديال ناس لي خدامين التجارة الألكترونية ماعارفينش أنه من الممكن يقدرو يخدمو Dropshipping و Cash on Delivery فنفس الوقت.
بما آن مجال Dropshipping وصل للنهاية ديالو و دابا غادي وكايرج لور ، هنا بعض الموردين Suppliers فالصين مبقاش عندهم الطلب العالي لمنتوجات التجارة الالكترونية لي كتعتامد على نظام Dropshipping و ولاو كيقيلو الطلبيات لي كتجيهم بنظام Cash on Delivery أنا ماكانقولش كاع Suppliers ولكن فئة لي قليلة لكتراوح مابين 5 حتال 8 فالمئة من جميع الموردين أي صحاب الجملة الصينين لي كيبيعو ف مواقع الجملة بحال Alibaba او Ofweek او Made-in-china الخ
ولكن غاتسولوني وتقولو ليا بلي هادشي فالصين ماشي فالمغرب واخا
حنا هنا أش غايخصنا نديرو غانخدمو بتقنية CODD ولكن مع سيبلاير لي عندنا هنا يعني مع صحاب الجملة لي عندنا هنا
هاد الطريقة لي كنقول ليكم شخصيا ماخدمتش بيها ولكن نصحت بيها 3 ديال ناس ماكانش عندهوم راس المال الكافي باش يبداو وخدمو بيها وصدقات ليهم وراهم غاديين مزيانيين دابا
أول حاجة هيا غانشوفو المنتج أو المنتجات لي باغيين نبيعو من بعد وغانشرح ليكم كيفاش ديرو تجيبو المنتجات الرابحة
واخا مثلا مثلا لقينا بلي هاد المنتوج كيتباع بزاف وعليه الطلب بزاف مثلا هاد الكوفر من بعد غانشوفو صحاب الجملة لي عندنا مثلا انا فالناضور ولي يكون عندهم هاد الكوفر كيبيعوه غانمشيو عندهم غانقولو ليهم باغيين نبقاو ناخدو عليكم السلعة ولكن ماغانبقاش ناخدو شي كمية لي كبيرة غانبقاو ناخدو غي حبة زوج على حساب الطلب لي غايكون عندنا ولكن راحنا غانكونو كليان أوفياء ليكم
شوف راه كون أكيد 100 ف 100 بلي غايقبل العرض ديالك وغايقوليك صافي اللهم يسر تما نتا أش غادير غاتشوف واحد ال 10 ولا 15 المنتج من عندو و صوروهم غي تصويرة وحدة غي باش تعقل عليهم باش مني تبغيو تلوهوم فسطور ديالكم ماديروش شي منتجات أخرى و الطريقة باش تلوحو المنتجات ديالكم فسطور غانشرحها ليكم فالحصة القادمة إنشاء الله
واخا دابا هادا مسمار طرقناه نتا مني غاتلوح هاد المنتج وتروجو و يجيك شي طلب مثلا جاك 20 طلب تما غاتمشي عند الفورنيسور لي تفاهمت معاه وغاتاخد عليه دوك المنتجات وتخلصو فيهم وسير سافطهوم لماليهم صافي هانتا ساليتي
ومن بعد إنشاء الله مني تخدم بهاد الطريقة وتكسب خبرة فهاد المجال وتجمع بيها واحد راس المال لي محترم غا تولي تشري من سوق الجملة حيت اسواق الجملة في المغرب كاييين بزاف ولكن لي معروفين بزاف وتقد تلقى فيهم أي حاجة بغيتي في الدار البيضاء “درب عمر” و “غراج علال” و كذلك بمدينة أغادير سوق “إنزغان”.
يتبع ….
